საიტზე მიმდინარეობს ტექნიკური სამუშაოები

გულითადად მოგესალმებით ლიტვის რესპუბლიკაში საქართველოს საელჩოს ოფიციალურ ვებ-გვერდზე. ვიმედოვნებ, რომ ვებ-გვერდის საშუალებით მიიღებთ თქვენთვის საინტერესო ინფორმაციას ჩვენს ქვეყნებს შორის თანამშრომლობის შესახებ, რომელიც ძალზე დინამიურად ვითარდება მრავალი მიმართულებით. მეტიც, საქართველო და ლიტვა აქტიურად განაგრძობენ მჭიდრო პარტნიორული კავშირების გაღრმავებას, რომელიც ეფუძნება საერთო მისწრაფებებს, ინტერესებსა და ღირებულებებს. 
ჩვენი თანამშრომლობის ურყევ საფუძველს ასევე წარმოადგენს მტკიცე ხალხთაშორისი კავშირები. ჩვენ ყოველთვის გვაერთიანებდა არა მხოლოდ ურთიერთსიმპათია, არამედ აგრეთვე სწრაფვა სახელმწიფოებრიობისა და თავისუფლების განმტკიცებისაკენ.
ძალზე ფასეულია ლიტვის მხარდაჭერა ჩვენი ქვეყნის სუვერენიტეტისა და ტერიტორიული მთლიანობისადმი. ლიტვას ასევე უმნიშვნელოვანესი წვლილი შეაქვს საქართველოს ევროპული და ევრო-ატლანტიკური ინტეგრაციის პროცესში და მხარს უჭერს ჩვენს ქვეყანას იმ პრიორიტეტების განხორციელებაში, რომლებიც განსაზღვრავს საქართველოს საგარეო პოლიტიკურ დღის წესრიგს.
ტრადიციულად, აქტიურად ხორციელდება ორმხრივი ვიზიტები როგორც მაღალ დონეზე, ასევე დარგობრივ უწყებებს შორის. 2009 წელს საგარეო საქმეთა სამინისტროებს შორის ხელი მოეწერა ქარტიას ევროპულ და ევრო-ატლანტიკურ სტრუქტურებში ინტეგრაციის შესახებრომელიც განახლდა 2015 წელსქარტიის ფარგლებში, დაფუძნდა საქართველო-ლიტვის ევროპული და ევრო-ატლანტიკურიინტეგრაციის კომისიარომლის შეხვედრებიც რეგულარულად იმართება.
წარმატებულად ვითარდება თანამშრომლობა საკანონმდებლო ორგანოთა დონეზე.აღსანიშნავია, რომ საქართველოსთან თანამშრომლობის ჯგუფი ერთ-ერთი ყველაზე მრავალრიცხოვანია ლიტვის სეიმში.
ასევე ხაზგასასმელია ლიტვის მნიშვნელოვანი კონტრიბუცია საქართველოში დემოკრატიული ინსტიტუტების გამტკიცებასა და მიმდინარე რეფორმების განხორციელებაში. ამ თვალსაზრისით, საქართველოში წარმატებით მიმდინარეობს ლიტვის მიერ მხარდაჭერილი განვითარების თანამშრომლობის პროგრამები. განსაკუთრებული მნიშვნელობა ენიჭება თანამშრომლობას ეკონომიკურ, ენერგეტიკულ, გარემოს დაცვის სფეროებში. ამ მხრივ, ასევე ძალზე ფასეულია ლიტვის მიერ მხარდაჭერილი ტვინინგ-პროექტები და გამოცდილების გაზიარება.
აღსანიშნავია, რომ უკანასკნელ წლებში დიდი იმპულსი შეიძინა თანამშრომლობამ ტურიზმის სფეროში, რასაც ხელს უწყობს პირდაპირი საჰაერო მიმოსვლაც ვილნიუსსა და ქუთაისს შორის, კერძოდ, მუდმივად იზრდება ლიტველ ვიზიტორთა რაოდენობა საქართველოში.
გამორჩეულად აქტიურია კულტურული და ჰუმანიტარული ურთიერთობები.
  2013 წლიდანლიტვის მთავრობის გადაწყვეტილებითგაიცემა სტიპენდიებისაქართველოს მოქალაქეებისათვის ლიტვის უნივერსიტეტებში სამაგისტროპროგრამებზე სასწავლებლადამასთან, საქართველოს ტექნიკურ უნივერსიტეტშიფუნქციონირებს ლიტვანისტიკის ცენტრიხოლო  ვილნიუსის უნივერსიტეტშიმოქმედებს ქართული ენისა და კულტურის შემსწავლელი კურსი. ასევე ტრადიციულად  აქტიურია რეგიონთაშორისი თანამშრომლობა, მათ შორის, დაძმობილებული ქალაქების დონეზე.
ამდენად, ერთმნიშვნელოვნად შეიძლება აღინიშნოს, რომ ლიტვა წარმოადგენს საქართველოს უახლოეს პარტნიორსა და მოკავშირეს. საქართველოს საელჩო აქტიურად განაგრძობს მუშაობას ჩვენს ქვეყნებს შორის არსებული მჭიდრო ურთიერთქმედების შემდგომი გაღრმავებისათვის. ამ თვალსაზრისით, 2018 წელი უდავოდ გამორჩეულია, ვინაიდან საქართველო აღნიშნავს ასი წლისთავს პირველი დემოკრატიული რესპუბლიკის გამოცხადებიდან, ხოლო ლიტვაში საზეიმოდ აღინიშნება სახელმწიფოებრიობის აღდგენის ასი წლისთავი. ამ ღირსშესანიშნავი თარიღის გათვალისწინებით, დაგეგმილია როგორც მაღალი დონის ორმხრივი ვიზიტების განხორციელება, ასევე არაერთი ერთობლივი კულტურული ღონისძიების გამართვა.
დარწმუნებული ვარ, ჩვენი ვებ-გვერდი დაგეხმარებათ მოიძიოთ თქვენთვის სასურველი ინფორმაცია როგორც საქართველო-ლიტვის ორმხრივი ურთიერთობების თაობაზე, ასევე ჩვენს ქვეყნებს შორის მიმდინარე თანამშრომლობასთან დაკავშირებით.
გთხოვთ ასევე ეწვიოთ საელჩოს ოფიციალურ გვერდებს სოციალურ ქსელებში: 

facebook.com/vilnius.georgia.embassy

twitter.com/GeoEmbassyLT
youtube.com/GeoEmbassyLT